KRIV JE!
Na pusni utorak 17. febrara 2026. leta točno na polne TEMULJATOR je osujen za sa nedela ča ih je storil va pasanen lete!
Kriv je za se grdo ča se j’ dogodilo va područnoj škole. Storil je više škodi nego koristi i zato je važgan!
Tekst osude morete pročitat va cijelosti ovde:
Temuljatore:
– kriv si ča prerano počne škola
– kriv si za prekratke ferije
– kriv si ča ni padal sneg kad je škola pa da pobegnemo doma
– kriv si i ča va škole imamo puno sati, a doma preveć zadaći
– kriv si za naše slabe ocjeni
– kriv si ča su nan teške borši
– kriv si ča smo nekad slabe voji
– kriv si ča va škole imamo samo marendu, a ne i obed
– kriv si ča teta Mirjana gre va penziju.
Ime smo ti dali Temuljator aš muljaš, muljaš, muljaš i vučeš nas na tvoju butegu va koj su sakakove bedastoće ke nan ne rabe. Za to smo ti dali celi takujin i za to si kriv.
Kriv si i za poplavu va škole, aš su krov delali oni ki su s tobun.
Kriv si ča va razrede imamo TEMU-radijatore ki preveć griju ili ne griju.
A najviše si kriv ča će škole bit i pokle tebe.
Imaš ča reć da se obraniš?
Para nan se da nimaš.
Sretno na drugin svete!
Učenici Matej Jakovašić, Gianpaolo Uhač i Ivan Rubinić razveselili su okupljene z muzikun.
Zahvaljujemo načelniku Rikardetu Staraju, Đeriju Rudanu, Neletu Brubnjaku i Gobotu-Mateotu Rudanu ča su se odazvali pozivu i skupa s nami zapalili školskega pusta!
Hvala i vatrogascu Matteotu Bradičiću ča je pazil na red i da se dobro pasa i komunalnemu redaru Borne Berošu na pomoći va organizacije.
